محمد الجبارة – الإمارات نيوز
ردت الفنانة الكويتية هيا الشعيبي على بعض منتقدي بكائها على الفنان القدير الراحل عبد الحسين عبد الرضا، عبر حسابها على موقع “سناب شات”.
وقالت “الشعيبي”: “صباح الخير صباح النور صباح الورد، وأمس كان آخر يوم عزاء لحبيب الكل حبيب الملايين حبيب القلب أبونا كلنا بابا عبد الحسين عبد الرضا الله يرحمه، ويغمد روحه الجنة، الحين يقدر الواحد يتنسم يقدر يتكلم يقدر يسوي اللي يسويه عقب اللي إحنا مرينا فيه.. لأنه الحزن صج بالقلب، لكن المشاعر اللي داخل القلب ماحد يقدر يخفيها هذه نقطة”.
وأضافت: “النقطة الثانية اللي بقولها يعني أنا بجيت وصورت لأنه كانو فانزاتي يسألون عني لمن جابو لي الخبر بثلاث أيام تعبت، وفعلا طحت على زوجي وارتفع سكري لأنه مو اشوي اللي صار هذا البكى اللي بكيته، ماكنت حاسه بعمري وراسي كان يألمني”.
وتابعت: “في شغلة بقولها اللي صور مقطع بكي وركب ومدري شنو وماله داعي تصورن وتبجون يعني اللي ماعنده مشاعر صوب عمي بوعدنان بس الحزن بالقلب، ومدري شنو كيفكم بس لا تعلقون.. في وحدة ممثله مو من الكويت من بره وهي عارفه نفسها اللي مركبين المقطع أهي ما قالت اسمي بس الصورة ركبوه مع بعض لأنه أنا أعرفها وهي تعرفني عدل”.
واستطردت: “أنت لمن تكلمتي يمكن مو عني بس ماله داعي تتكلمين لأنه في ناس مقربه له أنت يمكن عمرك ماشفتي عمي بوعدنان، ولا وقفتي جنبه لكن إحنا ناس عشنا معاه وقعدنا معاه وأكلنا معاه، لأنه في أشياء وايض ناس ماتعرفها يعني عمي بوعدنان بالتصوير ووراي الكاميرا شيء ثاني، إحنا بمسلسل التنديل كم شهر قعدنا معاه ضحكتنا جمعتنا شنو الواحد يقول وشنو يخلي بس على طول علقتو بجت ومدري شنو.. شنو فيه يعني لو أنا مسويه مقطع سوالف ومدري شنو جان ماعلقتو جذي على بجي بجيته، على إنسان عزيز علي، فأنا ما أقبل على هذا الشيء تاخذون المقطع وتركبون وتسون سوالف عيب عيب استحو هذي مشاعر أنتوا ما تحسون فيها إلا للناس المقربة له اللي تحبه، وتعزه”.
وأكدت “هيا”: “على فكرة اللي عاتبوني علشان أخوي أنتوا تدرون أنا شنو مسويه مع أخوي أنتوا تدرون شنو بيني وبين أخوي.. اسألوا نفسكم هل الفترة هذي ثامر وينه عني ياربي بعد الواحد ما يصير ينخل سوالفه وسوالف أهله، وما أقدر اتكلم نقط لأنه هذي أشياء تخصني وتخص عائلتي، وأنا شملت الكل ومن ضمنهم أخوي استحوا انتقوا وهذا الكلام اشوه إنه اللي طبو وتكلمو عنه ياريتهم من الكويت من بره الكويت، واي مالكم شغل فينا نهائيا”.
واختتمت قائلة: “عموما اللي بقلبي قلته وكنت ناطرة اتكلم بهذا اليوم وبس والحياة تمشي والله يرحمك يا عمي بوعدنان ويغمد روحك الجنة، ونقول أهل عمي بوعدنان سامحونا على القصور، وأحب بهذه الصباح الله يحفظج يالإمارات ويحفظ أهلك وشعبك الغالي والله لا يفرق بينكم أمين يارب العالمين يالعزيزين يالغالين علينا كلنا، والله يبعد عنكم الفتن ووحدكم يارب أحبكم يا أهل الإمارات”.
