متابعة- بتول ضوا
بعد الجدل المثار لظهور الدكتور محمد عبد الستار في فيديو وهو يدرب مغني المهرجانات حمو بيكا على “الموسيقى” استعداداً لخوضه اختبارات نقابة الموسيقيين.
رد الدكتور عبد الستار على الجدل بالقول الفيديو قديم وصور دون علمه متهما حمو بيكا برغبته فى كسب تعاطف الناس وبيعمل “شو” .
من جانبه كتب عبد الستار بياناً مطولاً على صفحته الشخصية على “فيس بوك”، أبرز ما جاء فيه: “حمو بيكا هو شخص بيأدى نوع من المزيكا أنا لا أؤمن بيه ولا بسمعه ولكن هو موجود ومنتشر ومش محتاجة أي إنكار مني أو من غيري” .
وأضاف: “رقم اتنين بكل بساطة النقابة عملت دورها قدام الإعلام و هو أنهم يظهروا الحقيقة. إنهم مش بيحاربوا حد من غير مبرر و حبوا يساعدوهم أو يمدوا لهم إيدهم بمعنى أصح لأشهرهم.
ونظراً للثقة الكبيرة الحمد لله من أعضاء النقابة فيا وفي تاريخي في تدريب الأصوات لأسماء كبيرة جداً. دربتها طول حياتي ومش هذكر حد منهم احتراماً لخصوصيتهم.
تم ترشيحي إني أدربه عشان يقدر يؤدي في الامتحان. واللى حصل بكل بساطة إننا اتقابلنا مرتين. ومن خلالهم قدرت أحدد هل هو يملك الموهبة الكافية تخليه يؤدي في الامتحان ولا لا.
وبعد المرتين اللى ممكن يكونوا بقالهم سنة تقريباً واللي اتاخدت فيهم الصور من غير علمى بالمناسبة. ماحصلش أي مقابلة تاني نظراً لعدم اهتمامه من الأصل إنه يطور من نفسه أكتر أو يحاول يكون أحسن. هو بس بيحاول يكسب تعاطف ويعمل استعراض إنه بيحاول و ده مش حقيقي أبداً وده كل الوضع بالتفصيل الدقيق .
وتابع: مع احترامى لكل اللي شفتهم واللى بيقولك عشان الفلوس أنا آسف جداً وبعتذرلكم. نسيت أقولكم على مدار حياتى إني مدرب أصوات فعلاً وده شغلي فعلاً.
اللي بأدايه بحُب وقدامه مقابل مادي آسف لو ده مايضايقكوش يعني .. والجهة اللي بيدافعوا وزعلانين على الفن وعلى حاله يا ريت كل حد يوضح هو قدم إيه عشان ينصر الفن اللى هو بيدافع عنه”.
واستكمل: “المجتهد ضعيف الموهبة هينجح وهيبقا حاجة. متكامل المواهب اللي قاعد في البيت مستنى الناس كلها تيجى تخبط على بابه هيفضل حياته كلها فى بيته..
وأخيراً أنا دوري كمدرب للأصوات لفترة تعدى الـ 30 سنة وأستاذ دكتور ورئيس لقسم الغناء بالمعهد العالي للموسيقى العربية. بيخليني مستحيل أرفض أساعد أي حد وبالعكس في أقل منه موهبة. ويمكن شفت تعليقاتهم ومبسوط إني قدرت أساعدهم بفضل ربنا يكونوا أحسن ويبقا كمان عندهم الثقة اللي تخليهم ينتقدوا”.
واختتم: “الكل يستاهل فرصة يتحددله هو يقدر وعنده موهبة حتى لو بنسبة ولا لا.. و بردو الواحد كان نفسه يشوف الاهتمام الكبير والعظيم ده. وهو بيحاول يعمل حفلات بمجهودات شخصية عشان يفضل يقدم الأصوات اللى تستاهل.
لو كل واحد شفته انتقد وعلق على الموضوع ده بالتحديد كان قدم دعم لأى حد بيغنى بجد، كان زماننا عملنا ألف نجم فى السنة”
