على غير عادته ومحاولته لإنهاء الأمر داخل الغرف المغلقة بينه وبين المطرب تامر حسني، خرج الملحن المصري محمود خيامي على صفحته الرسمية علي موقع التواصل الاجتماعي فيسبوك ليكشف عن أزمة مع تامر حسني ونجم برنامج ذا فويس المطرب فريد غنام.
وكتب عبر صفحته “لما يكون فنان المفروض أنه مشهور ونجم والمفروض أنه زميل رحلة كفاح ونفس الجيل اسمه تامر حسني ويسرق فكرتك ومجهودك وما يقدرش تعبك وتحاول تتواصل معاه على أساس إنه بيغير رقم تليفونه كل 10 دقايق يبقى ده إسمه إيه؟ لما من زمان يضرب لك أغاني عالإنترنت ويسربها وطبعا لا أنا ولا الشاعر أخدنا أجور مرة واتنين وتلاتة ده يبقى اسمه إيه؟” .
وبعدها قام خيامي بكتابة تعليق أخر حول تامر حسني ومطرب ذا فويس فريد غنام وقال “الأغنية اللي بتكلم عنها إن تامر سرق فكرتها وجزء من لحني اللي حوره عشان يقول إنه لحنه هي الديو اللي عاملها مع الشاب خالد، الأغنية دي أصلا فكرتي وتوزيع خالد نبيل والتراك عندي عالميل من 3 سنين وده يثبت حقي في الغنوة دي كانت ديو تامر مع فراولة، فريد غنام، اللي كان مع شيرين في ذَا فويس وبالفعل كلمنا الولد وللأسف تامر طلب مني أطلب من فراولة إنه يكتب على تويتر وفيس إن أمنية حياته يشتغل مع نجم الجيل العظيم تامر حسني”.
وتابع: “بالفعل طلبت من فراولة ونفذ الولد ياعيني تامر حب يأڤور شوية فقالي شيرين حتزعل وتقول إني أخدته منها قولتله شيرين بقالها سنة ما عملتش حاجة للولد فنجم الجيل قالي قول لفراولة ينزل فيديو عاليوتيوب بيقول إني دخلت ذَا فويس أصلا عشان تامر يشوفني ويساعدني ويدعمني على أساس إن تامر بيدعم المواهب”.
وأضاف “يومين ولقيت تامر بيكلمني يقولي لو فراولة مجاش خلال أسبوع مش حنقدر نسجل وطلب مني أخلي فراولة يرفع الفيديو من اليوتيوب حسّيت بغدر من تامر فطلعت عالمجمع أقدم فيزا لفراولة على مصر وربنا سهلها وأخدت الموافقة، كلمت تامر قولتله أنا وفراولة جاهزين قالي خليه ييجي قولتله يا تامر المفروض إنت اللي تبعتله التذاكر والإقامة، المهم تامر اختفى ونزل ألبومه من غير الغنوة”.
ويبدو أن الأزمة بين تامر حسني ومحمود خيامي ستزداد خلال الفترة المقبلة خاصة وان الملحن المصري حاول إنهاء الأزمة من قبل وفشل .
