فتحت ابنة المطرب المصري علي الحجار، النار على الممثل المصري محمد رمضان بسبب حديثه عن خلافه مع والدها.
وهاجمت مشيرة الحجار محمد رمضان عبر حسابها بموقع التواصل الاجتماعي “فيسبوك”، قائلة: “القصة دي رمضان حكاها كذا مرة في برامج و كل مرة يغير فيها تفصيلة بسيطة، و ابويا عمره ما رد، و كان شايف ان الموضوع مش مستاهل يترد عليه، و انا الصراحة مستغربة جدا هو ازاي بيحكيها بثقة قوي كده و جاب الخيال ده منين؟”.
وأضافت: “أنا قررت دلوقتي اني اقول القصة الحقيقية لأن ابويا يستاهل ده، و ده حق ربنا، و هيشهد على كلامي اخويا Ahmad A. ElHaggar لأنه كان له دور رئيسي في المسرحية، غير ان طبعا المسرحية ليها ابطال و مخرج عارفين الحقيقة”.
وتابعت: “اللي حصل ان المخرج اختلف مع محمود عزب احد الابطال، خلاف شخصي فقرر يفاجيء الفنانين بانه جاب رمضان يوم واحد، علي الحجار شاف ان عزب مايستحقش كدة بعد تعبه في 6 شهور بروفات و قال لرمضان وقتها انت ملكش علاقة بالموضوع خالص وكان حيادي جدا”.
وواصلت: “فقرة الناس اللي كتفوه و ضربوه دي ما حصلتش، ولا عمر أبويا أصلا كان عنده بودي جارد، و موضوع القلم الالماظ عليه علامات استفهام كتير”.
واستكملت: “جو المعاناة اللي رمضان عايش فيه ده وإن الناس افترت عليه وهو صامد كالجبل رخيص قوي، والكدبة ان دلت على حاجة فهي تدل على شخصية صاحبها”.
واستطردت قائلة: “اتعرفوا كويس على الفنان المكافح محمد رمضان، وعلى فكرة كلنا بنكافح بطريقتنا، أبويا نفسه جي من عيلة بسيطة وكافح وبنى نفسه بس الموضوع مش لبانة في بقه يستعطف بيه الناس”.
واختتمت حديثها قائلة: “إحنا في زمن الكدب والافتراء شيء عادي جدا، والكدبة او الفضيحة تنتشر آه، إنما تنشر الحق؟ لأ طبعا! الناس تحب الفضايح”.
